Presidenti i Shqipërisë, Ilir Meta sot gjatë vizitës së tij në Manastir tha se Kongresi i Manastirit është ngjarje jashtëzakonisht e rëndësishme pasi përshpejtoi një tjetër ngjarje të rëndësishme, Pavarësinë e Shqipërisë.

Kreu i shtetit shqiptar së pari u takua me kryetaren e komunës së Manastirit, Natasha Petrovska, ndërsa më pas e vizituan Muzeun e Alfabetit shqip në këtë qytet, njofton Zhurnal.mk.

“Është nder për mua si President i Shqipërisë të vizitoj qytetin e Manastirit dhe të shpreh kënaqësi që gjendem në vendin e shenjtë të shqiptarëve, pa dallim ku ata jetojnë, vendi ku patriotët më të guximshëm para 109 viteve bënë unifikimin e alfabetit shqip. Kongresi i Manastirit është ngjarje tejet e rëndësishme sepse përshpejtoi një tjetër ngjarje të rëndësishme, Pavarësinë e Shqipërisë”, theksoi Presidenti Meta i cili falenderoi publikisht zv.kryeministrin Hazbi Lika dhe kryetaren Natasha Petrovska për kujdesin që i kushtojnë Muzeut dhe për planet për restaurim të Muzeut.